أحيانا منتذكر شغلات كنا نعملها من زمان ومنصير نضحك ع حالنا وأحيانا منخجل ومنقول بينا وبين حالنا انو معقول انا كنت اعمل هيك و أحيانا بتصير تتذكر شغلات كنت تعملها وهلاء ما عم تقدر تعملها و بتقول لحالك ياريتني اقدر اعملها
و احيانا بتذكر الماضي وبتحنلوا وبتقول ياريتو يرجع مع انو الماضي بيجوز ما يكون صرلوا زمان ماضي يعني من سنة ممكن تحن للاشيا اللي صارت من سنة مع انك ما كنت بحالة فرح بس كنت احسن من هلق
و أحيانا من كتر ما بتصير معك مصايب بهالحياة بتقول بينك وبين حالك وبتسأل ربك انو ليش هيك ياربي فمدري كيف في شي أبن حلال بيسمعك وبينقفك هديك الكلمة انو هاد اختبار انو أي والله بعرف انو في اختبارات ألهية بهالحياة بس أكيد يعني انو مو جاي عبالي حس انو انا لحاي اللي خاضع للاختبار و انو اللي حوالي خزيت العين عليهون مدري كيف مظبطين امورهون ع الله وما عندهون لا اختبارات ولا امتحانات
و أحيانا بتحب تشتي الدنيا بتقوم بتطلع الشمس
وأحيانا بتحب حدا بيطلع هالحدا ما بيحبك
واحيانا بتمنى تلتقي بشي حدا تحبوا بتقوم بتلتقي بواحد بتكرهوا
و احيانا بتحب تشيل كلمة أحيانا من قاموس هالحياة او بالاحرى حياتك الشخصية بتلاقي أنو حياتك كلها ما بتمشي إلا بأحيانا
أحيانا .....ا
1 comment:
ضحكتني زين مع انو الامر واقع فعلا ً ، في أمور كثيرة بالحياة تمشي عكس التيار لكن لا تنسى أنـّو "أحيانا ً " بيمشي الحال و بتشتي وقت بتتمناها تشتي و بحبك اللي بتحبه و بتلتقي باللي بتحبو و بتضيف كلمات كتيرة جديدة لقاموس الحياة ..
تحياتي
Post a Comment